Breaking News :

चितवनमा दुई सयभन्दा बढी सिसी क्यामरा जडान हुँदै

शान्ति सुरक्षालाई थप मजबुद बनाउन चितवनको विभिन्न स्थानमा दुई सयभन्दा बढी सिसी क्यामरा जडान गर्ने प्रक्रिया थालिएको छ । जिल्लाको बजारक्षेत्रमा यसअघि ४१ सिसी क्यामरा जडान गरिए पनि आर्थिक समस्याका कारण सञ्चालनमा समस्या हुँदै आएका बेला विभिन्न क्षेत्रमा सयौं सिसी क्यामरा थप्न लागिएको हो ।

पुरानो क्यामरामा नयाँ थप गरेर २८५ वटा सिसी क्यामरा सञ्चालनका लागि आवश्यक प्रक्रिया थालिएको चितवनका प्रहरी उपरीक्षक दानबहादुर मल्लले जानकारी दिनुभयो । उहाँका अनुसार क्यामरा जडानका लागि सर्वेक्षणको काम सकिएको छ । क्यामरा जोड्न रु ९० लाखभन्दा बढी लाग्ने अनुमान गरिएको छ । यसमा ७५ प्रतिशत गृह मन्त्रालय र बाँकी २५ प्रतिशत रकम स्थानीय निकायसँग माग गरिएको उहाँले जानकारी दिनुभयो ।

यसपटक भरतपुर महानगरपालिकाको ९१ स्थानमा १६०, रत्ननगर नगरपालिकाको १० स्थानमा १५, कालिका नगरपालिकाको आठ स्थानमा १२, खैरहनी नगरपालिकाको छ स्थानमा आठ, माडी नगरपालिकाको सात स्थानमा १४ र इच्छाकामना गाउँपालिकाको नौ स्थानमा १७ वटा सिसी क्यामरा राख्ने ठाउँको पहिचान भइसकेको जनाइएको छ ।

जडान गर्न लागिएको सिसी क्यामरा सामान्य, घुम्ने र उच्च प्रविधिको खालका छन् । प्रहरी उपरीक्षक मल्लका अनुसार सिसी टिभी निगरानी कक्षा स्थानीय तहको प्रहरी कार्यालय र जिल्ला प्रहरी कार्यालयमा रहनेछ । यसको नियन्त्रण जिल्ला प्रहरी कार्यालय चितवनले गर्ने छ ।

जिल्लामा यसअघि जडान गरेको ४१ मध्य पाँच वटा मात्रै सञ्चालनमा छ । बिग्रिएका क्यामराको मर्मत गर्ने काम शुरु भइसकेको प्रहरी उपरीक्षक मल्लले जानकारी दिनुभयो । सिसी क्यामरा जडान गरेपछि जिल्लामा हुने दुर्घटनाको कारण पत्ता लगाउन, भागेको सवारीसाधन नियन्त्रण गर्न र आपराधिक क्रियाकलापमा संलग्न व्यक्तिहरुको पहिचान गर्न सहयोगी हुनेछ । क्यामरा सञ्चालनलाई निरन्तरता दिन स्थानीय तह र व्यावसायिक संस्थाको सहकार्यमा मर्मत गर्ने सहमति पनि भएको जनाइएको छ । रासस

merokhabarsathi

Read Previous

सहायक वन अधिकृत तीन लाख घुससहित पक्राउ

Read Next

चितवनका पत्रकार बराल माथि घरमै घुसेर आक्रमण

Leave a Reply

Your email address will not be published. Required fields are marked *