Breaking News :

बुधबार पनि प्रतिनिधिसभाको बैठक अवरुद्ध

प्रतिपक्ष दल नेपाली कांग्रेस र राजपा नेपालले बुधबार पनि प्रतिनिधिसभाको बैठक अवरुद्ध गरेका छन् ।

सभामुख कृष्णबहादुर महराले बैठक सुरु गर्नेवित्तिकै प्रतिपक्ष दलका सांसदहरुले विरोध गरेका थिए । सर्लाहीमा यही असार ५ गते प्रहरीको गोली लागेर मृत्यु भएका कुमार पौडेलको हत्याको छानबिन गर्न संसदीय समिति गठन गर्नुपर्ने माग गरी मंगलबारदेखि प्रतिपक्ष दलका सांसदहरुले बैठक अवरोध गर्दै आएका छन् ।

प्रतिपक्षको अवरोधकैबीच सभामुख महरा कार्यसूचीमा प्रवेश गरेपछि प्रतिपक्षका सांसदहरुले ‘रोष्ट्रम’ घेराउ गरेका थिए ।

रोष्ट्रम घेराउकैबीच सभामुखको निर्देशनानुसार प्रतिनिधिसभाका सचिव गोपालनाथ योगीले राष्ट्रियसभाबाट प्राप्त सन्देश पठेर सुनाए । सचिव योगीले प्रतिनिधिसभाबाट उत्पत्ति भइ राष्ट्रियसभा गएका चारओटा आर्थिक विधेयक राष्ट्रियसभाबाट पारित भएको सन्देश सुनाए ।

यसैबीच, प्रतिपक्ष दलका सांसदहरुले सभामुख सरकारको आदेशपालनकर्ता भएको आरोप लगाएका छन् । सन्चारकर्मीहरुसित कुरा गर्दै नेपाली कांग्रेसका सांसद गगन थापाले प्रतिपक्ष सांसदले विरोध गर्दा पनि सभामुखले बोल्न नदिएको र प्रतिनिधिसभालाई सरकारको छाया बनाएको आरोप लगाए ।

उनले संसदीय समिति गठन गर्ने मंगलबारको आफ्नै प्रतिबद्धताबाट सभामुख पछि हटेको जिकिर गरे । तर, सत्तारुढ दल नेकपाका सांसद झलनाथ खनालले प्रतिनिधिसभा नियमावलीअनुसार नै चलिरहेको भन्दै अनावश्यक कुरामा संसदीय समिति गठन गर्न नसकिने बताए ।

सभामुख महराले संसदीय समिति गठनका लागि पहल गरेपनि सत्तारुढ दल नेकपाले मंगलबार असहमति जनाएको थियो । प्रतिनिधिसभाको अर्को बैठक यही असार ३० गते दिउँसो १ बजे बस्नेछ ।

merokhabarsathi

Read Previous

आन्दोलन गरे फेल गराउने चितवन मेडिकल कलेजको धम्की

Read Next

सामर्थ्य नेपालमा विवाद, अध्यक्ष भुषालले समाज सेवाको नाममा राजनिति गरेको आरोप

Leave a Reply

Your email address will not be published. Required fields are marked *