प्रधानमन्त्री केपी शर्मा ओलीले गणतन्त्र केवल राजनीतिक प्रणाली मात्रै नभई समग्र सामाजिक रुपान्तरणको व्यवस्था भएको बताएका छन् ।

गणतन्त्र दिवसका अवसरमा प्रधानमन्त्री ओलीले शुभकामना सन्देश जारी गर्दै विकासका लागि हाम्रो प्रस्थानविन्दु सबैलाई खाद्य व्यवस्था, आवास र कपडा, शिक्षा र स्वास्थ्य एवं सुरक्षा भएको उल्लेख गरेका छन् ।

उनले नागरिकको अनुहार मलिन हुने विवशता अन्त्य गर्ने संकल्प लिएको र यसलाई सार्थक बनाउन सरकार दृढ रहेको उल्लेख गरेका छन् ।

प्रधानमन्त्री ओलीले जनताको जीवनमा लोकतन्त्रको सार्थक अनुभूति गराउने अभियानमा विकास, समृद्धि, सुशासन एवं स्थिरता सरकारको मुख्य गन्तव्य भएको तथा गरीबी, विपन्नता, पछौटेपन, सामाजिक उत्पीडन तथा शोषण, विभेद र भ्रष्टाचारविरुद्ध सरकार केन्द्रित रहेको उनको शुभकामना सन्देशमा उल्लेख छ ।