Breaking News :

भरतपुरको केरुङ्गा घोल व्यवस्थित गरिँदैं, डिपिआर निर्माणको काम धमाधम

भरतपुर महानगरपालिका–११ हुँदै राप्ति नदीसम्म पुगेको केरुङ्गा घोललाई व्यवस्थित गरिने भएको छ । घोलको बीचभाग र दायाँवायाँ अतिक्रमण हुने क्रम बढेकाले घोललाई सिमाङ्कन गरी व्यवस्थित गर्ने प्रक्रिया अघि बढाइएको हो । भरतपुर महानगरपालिका–११ मा नारायणी लिफ्ट सिँचाइबाट शुरु भएको यस घोल वडा नं १२, ९, ८, ५, १२, १३, १४, २२ र २३ हुँदै केरुङ्गा खोला बनेर राप्ति नदीमा मिसिन्छ । भरतपुरको मुख्य क्षेत्रका ढलको पानी यसै घोलमा मिसाइने गरिन्छ ।

महानगरपालिका–११ का अध्यक्ष बाबुराम अधिकारीका अनुसार घोलको विस्तृत अध्ययन प्रतिवेदन तयार गर्नका लागि काम शुरु गरिएको छ । नदी नियन्त्रण तथा जल उत्पन्न विभागले प्रतिवेदन तयार गर्नुपूर्व नापजाँचको काम गरिरहेको उहाँले बताउनुभयो । प्रदेश नं– ३ का प्रदेशसभा सदस्य विजय सुवेदीका अनुसार सर्भेक्षणका लागि जीओपम इन्टरनेशनल प्रालि काठमाडौँका दुई इञ्जिनीयर र सब इञ्जिनीयर खटिएका छन् । प्रारम्भिक चरणमा भरतपुर ११ को गणेस्थानदेखि ११ किलोमिटरसम्मको जग्गा नापजाँच गरी विस्तृत अध्ययान प्रतिवेदनका लागि बोलपत्र आह्वान गरिने उहाँले जानकारी दिनुभयो । सो घोलको लम्बाइ ३० किलोमिटरको छ ।

उहाँका अनुसार नापजाँच तयार भएपछि विस्तृत अध्ययन प्रतिवेदनका लागि बोलपत्र आह्वान गरिने र असार सम्ममा कामको जिम्मा लगाइने छ । प्रदेशसभा सदस्य सुवेदीले केरुङ्गा घोलले महानगरपालिकाको आधा जनसङ्ख्यालाई असर पार्ने भएकाले संरक्षण आवश्यक रहेको बताउनुभयो । उहाँले जिल्लामा पानी बग्ने नारायणी र राप्ती नदी पछिको महत्वपूर्ण घोल केरुङ्गा भएकाले यसमा भविष्यमा डुङ्गा चलाउन सक्नेगरी काम गरिने बताउनुभयो । यहाँ जल यातायातको पनि प्रशस्त सम्भावना रहेको भन्दै उहाँले घोलको दुबैपट्टी छेउमा साइकल लेनसँगै पैदलयात्रा गर्न मिल्ने गरी हरियाली बनाइने जानकारी दिनुभयो ।

केरुङ्ग घोल संरक्षण समितिका संयोजक कमल मल्लले भू–माफियाले केरुङ्ग अतिक्रमण गरेर भौतिक संरचना बनाएकाले अतिक्रमित क्षेत्र तत्काल खाली गरिने बताउनुभयो । घोलको दायाँवायाँ क्षेत्र नक्सामा कम्तीमा तीन मिटरभन्दा बढी रहे पनि अधिकांश क्षेत्रमा अतिक्रमण गरिएको छ । उहाँका अनुसार केरुङ्गका अधिकांश क्षेत्र अतिक्रमणको चपेटामा परेको छ । भरतपुर महानगरपालिका–११ को गणेस्थानस्थित नारायणी लिफ्टको सी ‘टु’ र सी ‘थ्री’ क्यानलबाट केरुङ्ग घोलको शुरुआत हुन्छ ।

नारायणी नदी व्यवस्थापन आयोजनाले पनि सो घोलको छ स्थानमा काम गरिरहेको छ । आयोजनाका प्रमुख मोहन शाक्यका अनुसार भरतपुर महानगरपालिका–१२, १४, १६ र २२ को छ स्थानमा तारको ग्याबिन राखेर तटबन्ध गर्ने र ढुङ्गाको गाह्रो लगाउने काम भइरहेको छ । ती ठाउँका लागि रु चार करोड ९६ लाख बजेट निकासा भएकामा बोलपत्र पनि कम मूल्यमा गराइएको उहाँले बताउनुभयो । प्रदेश सभासदस्य सुवेदीले भने विगतमा जे जसरी काम भए पनि आउँदो वर्षबाट विस्तृत अध्ययन प्रतिवेदन तयार गरेर मात्र काम गर्नका लागि प्रक्रिया अघि बढाइएको बताउनुभयो । रासस

merokhabarsathi

Read Previous

चक्रवात फानी:-चितवनमा पनि प्रभाव, अधिकांश विद्यालय बन्द

Read Next

चितवन र भारतको लिटिल फ्लावर स्कूलबीच भगिनी सम्बन्ध,केरालाका विधार्थी चितवनमा

Leave a Reply

Your email address will not be published. Required fields are marked *