चितवनमा अन्तर्राष्ट्रिय क्रिकेट रंगशाला निर्माणको घोषणा भएपछि पहिलो पटक चितवन आएका धुर्मुसले चितवनमा बन्ने रंगशाला नेपालको गौरब भएको बताउनुभएको छ।

उहाँले चितवन र समग्र नेपाललाई नै विश्वसामु चिनाउन रंगशाला महत्वपूर्ण हुने बताउनुभएको छ । उहाँले तोकेकै समयमा रंगशाला निर्माण सम्पन्न गर्ने दावी गर्नुभयो ।

भरतपुर महानगरपालिकाकी प्रमुख रेनु दाहालले भरतपुरमा रंगशाला निर्माणका लागि धुर्मुस सुन्तली फाउण्डेशनसंग सम्झौता भएपछि उत्साहित भएको बताउनुभयो । उहाँले रंगशाला निर्माणका लागि सरकारी तवरबाट हुने काम सबै महानगरले गर्ने प्रतिबद्धता जनाउनुभएको छ  । रंगशालाको डीपीआर निर्माणको कार्य शुभारभ्भ भएको महानगर प्रमुख दाहालले बताउनुभयो । उहाँले भरतपुर देशकै नमुना शहरको रुपमा विकसित हुने र रंगशालाले विश्वमै नेपालको गरिमा बढ्ने बताउनुभयो ।

भरतपुर महानगरपालिका प्रमुख दाहाल र फाउन्डेसनका अध्यक्ष धुर्मुसले अन्तर्राष्ट्रिय क्रिकेट राष्ट्रिय गौरवको आयोजनामा सहयोग गर्न स्वदेश तथा विदेशीमा रहने नेपाली दाजुभाई तथा दिदीबहिनीलाई आह्वान गर्नुभएको छ ।

कार्यक्रममा  नेकपाका नेता नारायण दाहालले अन्तर्राष्ट्रिय क्रिकेट रंगशाला निर्माण गर्न चितवनका राजनैतिक दलहरु सक्रियताका साथ लाग्ने बताउनुभयो । उहाँले देशका विकास निर्माणको युग शुरु भएको भन्दै त्यसमा हातेमालो गर्न सबैलाई आब्हान गर्नुभयो ।

नेपाली काँग्रस चितवनका सभापती जितनारायण श्रेष्ठ रंगशाला निर्माणका लागि काँग्रेसले सक्दो सहयोग गर्ने प्रतिबद्धता जनाउनुभयो । उहाँले काँग्रेस प्रतिपक्ष दल भएपनि विकास निर्माणमा सधै हातेमालो गर्ने बताउनुभयो ।